Publicidade

Diário Liberdade
Sexta, 23 Dezembro 2016 00:29

APDR pede precauçom nestas datas a respeito de aparelhos sem fios, telemóveis e as suas eventuais consequências sobre a saúde

Avalie este item
(2 votos)
País: Galiza / Saúde / Fonte: APDR

Neste Nadal, a Asociación Pola Defensa da Ría (APDR), coordinación galega da Plataforma Estatal Contra a Contaminación Electromagnética (PECCEM), lembra a nais e pais das alertas científicas e de distintas institucións europeas e internacionais sobre os riscos potenciais para a saúde das nosas fillas e fillos no uso de dispositivos sen fíos que emiten campos electromagnéticas (CEM) de radiofrecuencias (RF): teléfonos móbiles, teléfonos sen fíos, interfonos para a vixilancia dos bebés, dispositivos con Wi-Fi (tablets, smartphones),  xogos  e  xoguetes  con conexión sen fíos, etc.

Unha ampla bibliografía médica de miles de estudos describe efectos a curto prazo  (déficit de atención, hiperactividade, irritabilidade, problemas de concentración e memoria, prurito, molestias oculares, dermatite, dores musculares, cefalea, insomnio, ...) e en exposición crónica (electrohipersensibilidade –EHS-, síndrome de fatiga crónica, depresión, fibromialxia, arritmias, problemas cardíacos, epilepsia, autismo, Alzheimer, Párkinson, infertilidade, problemas hormonais, leucemia e outros cancros, ...) dentro dos límites legais de exposición aos CEM. Numerosos chamamentos médicos e científicos no ámbito internacional consideran que hai evidencia suficiente para aplicar o Principio de Precaución, rebaixando os límites de exposición aos CEM en base aos efectos biolóxicos coñecidos e minimizando a súa exposición, especialmente na poboación infantoxuvenil, como no Chamamento  Internacional (2015) á OMS e á ONU asinado por máis de 220 científicos de 41 países, investigadores expertos en bioelectromagnetismo e implicados no estudo dos efectos biolóxicos e médicos dos CEM non ionizantes.

Si a Axencia Internacional de investigación do Cancro -IARC- da OMS clasificou os CEM como posíbeis canceríxenos (ás moi baixas frecuencias en 2001 e as RF –Wi-Fi, telefonía móbil,…- en 2011), e o seu director deu consellos proteccionistas sobre o uso do teléfono móbil, o grupo de traballo BioInitiative presentou en 2012, 2014 e 2016 estudos que os clasificarían como canceríxeno coñecido, do mesmo xeito que o tabaco ou o amianto, segundo os parámetros do IARC/OMS. Nesta liña unha sentenza xudicial xa recoñeceu o nexo de causalidade tumor cerebral/móbil (Italia, 2012) e unha tele-operadora optou por compensar economicamente ante unha demanda similar (Israel, 2013).  

A Resolución 1815/2011 da Asemblea Parlamentaria do Consello de Europa –APCE- [na liña defendida pola Axencia Europea de Medio Ambiente (AEMA) dende 2007 e no Ditame sobre EHS da Sección TEN do Comité Económico y Social Europeo (xaneiro 2015), e ampliando as recomendacións proteccionistas da Resolución do Parlamento Europeo de 2009] solicita aos seus estados membros “Tomar tódalas medidas razoables para reducir a exposición aos campos electromagnéticos, especialmente ás radiofrecuencias emitidas por teléfonos móbiles, e en particular a exposición na infancia e mocidade”. Medidas como:

- “Informar sobre os riscos potenciais para a saúde dos teléfonos sen fíos DECT, os babyphones e outros aparatos eléctricos que emiten continuamente microondas pulsadas… e recomendar o uso de teléfonos con cable nos fogares, ou no seu defecto, modelos que non emitan permanentemente ondas pulsadas”.

- “Campañas de información dirixidas ao profesorado, nais e pais e o alumnado para advertirlles dos riscos específicos do uso precoz, indiscriminado e prolongado dos teléfonos móbiles e doutros dispositivos sen fíos”, primando para nenas e nenos en xeral centros de ensino libres de contaminación electromagnética (Wi-Fi, teléfono móbil), con “conexión a internet por cable”.

Nalgúns países xa recomendan algunhas formas de minimizar a exposición (especialmente en cativas e cativos) por parte de axencias sanitarias (Alemaña, Australia, Austria, Bélxica, Finlandia, Francia, India, Grecia, Reino Unido, Rusia, Suíza,… así como a propia AEMA) e asociacións profesionais [de medicina ambiental a nivel europeo e de países como Austria, Alemaña, Francia, EE.UU, Irlanda, Italia, Macedonia, Reino Unido, Suíza,…; colexios profesionais de biólogos como o de Galicia, de médicos como o de Viena e o de Austria, de pediatras como o de Alemaña e o de EEUU; médicos por escolas saudábeis; ... Ao mesmo tempo algunhas lexislacións de países europeos xa contemplan limitacións/prohibición do uso do Wifi no ámbito educativo e na comercialización e publicidade de dispositivos sen fíos para os máis cativos., ou desmantelamento das redes WIFI municipais (como nas gardarías de Hospitalet) a favor do cable.

Dende a APDR co-impulsan o MANIFESTO EUROPEO por unha regulación da exposición aos campos electromagnéticos (CEM) que protexa realmente a saúde pública, asinado na actualidade por científicos, investigadores e expertos, así como colexios e asociacións profesionais, e representantes de organizacións da sociedade civil  procedentes de 26 países.

Diário Liberdade é um projeto sem fins lucrativos, mas cuja atividade gera uns gastos fixos importantes em hosting, domínios, manutençom e programaçom. Com a tua ajuda, poderemos manter o projeto livre e fazê-lo crescer em conteúdos e funcionalidades.

Doaçom de valor livre:

Microdoaçom de 3 euro:

Adicionar comentário

Diário Liberdade defende a discussom política livre, aberta e fraterna entre as pessoas e as correntes que fam parte da esquerda revolucionária. Porém, nestas páginas nom tenhem cabimento o ataque às entidades ou às pessoas nem o insulto como alegados argumentos. Os comentários serám geridos e, no seu caso, eliminados, consoante esses critérios.
Aviso sobre Dados Pessoais: De conformidade com o estabelecido na Lei Orgánica 15/1999 de Proteçom de Dados de Caráter Pessoal, enviando o teu email estás conforme com a inclusom dos teus dados num arquivo da titularidade da AC Diário Liberdade. O fim desse arquivo é possibilitar a adequada gestom dos comentários. Possues os direitos de acesso, cancelamento, retificaçom e oposiçom desses dados, e podes exercé-los escrevendo para diarioliberdade@gmail.com, indicando no assunto do email "LOPD - Comentários".

Código de segurança
Atualizar

Publicidade

Quem somos | Info legal | Publicidade | Copyleft © 2010 Diário Liberdade.

Contacto: diarioliberdade [arroba] gmail.com | Telf: (+34) 717714759

O Diário Liberdade utiliza cookies para o melhor funcionamento do portal.

O uso deste site implica a aceitaçom do uso das ditas cookies. Podes obter mais informaçom aqui

Aceitar