Publicidade

Diário Liberdade
Quarta, 22 Fevereiro 2017 20:18 Última modificação em Sábado, 25 Fevereiro 2017 18:17

Galiza: Anunciam "III Encontro de ContraMINAçom sobre Impactos da Mineraçom"

Avalie este item
(0 votos)
País: Galiza / Resenhas / Fonte: Diário Liberdade

Será a 4 de março, organizado pola "Rede contra a mineraçom destrutiva da Galiza".

A rede galega de colectivos que tenhem realizado ou realizam ativismo contra diferentes projetos de mineraçom de grande impacto socioambiental organiza a terceira ediçom do seu "Encontro sobre impactos da mineraçom".

Será no sábado dia 4 de março em Compostela, incluindo um programa de atos formativos e informativos que conta com participaçom nom apenas galega, como também internacional.

Os recursos naturais básicos, como a terra e a água, estarám na mira dos debates e palestras, assim como os aspetos legais, socioeconómicos e ambientais que acompanham cada novo projeto de agressom de grandes empresas no ámbito da mineraçom. Também o papel das instituiçons, nomeadamente a Junta da Galiza, será analisado criticamente no II Encontro, que decorre no Centro Sociocultural Vite a partir das 10:30 horas e até as 20:30 horas do mesmo sábado.

Esta nova ediçom chega dous anos depois da anterior, que foi em Lugo em novembro de 2014.

A seguir, reproduzimos a programaçom prevista e toda a informaçom fornecida polos coletivos organizadores:

programa5
programa4

ContraMINAcción celebra os III Encontros sobre Impactos da Minaría o próximo sábado 4 de marzo en Santiago de Compostela (Centro Socio-Cultural Vite), desde as 10:30 h, coa participación destacada de membros de diversas organizacións internacionais que fan parte da rede global Si á Vida Non á Minaría / Ye​​​​s to Live No to Mining (YLNM), xunto con membros de diversas organizacións galegas.

A minaría é un tema de preocupación pública e cada vez máis candente en Galiza, así como noutras partes do mundo. Por este motivo, véñense celebrando bianualmente desde 2013 encontros para o debate sobre os impactos socioecómicos, legais e ambientais da minaría. Nestes III Encontros queremos prestar atención especial á destrución de auga, terra e aos procesos de criminalización dos que se opoñen aos proxectos mineiros, e tamén apuntar alternativas á minaría.

Na actualidade, a administración segue a manter unha actitude de desleixo cara os problemas ambientais e unha disposición favorable cara o desenvolvemento mineiro. Se ben a contestación social conseguiu que a Xunta xa non se atreva a afirmar como no pasado que “Galiza é unha mina”, as súas actuacións parecen seguir guiándose por dito slogan. As empresas mineiras continúan a recibir cuantiosas subvencións, ao tempo que se ignoran as mínimas esixencias ambientais e legais a esas mesmas empresas e se poñen todo tipo de trabas e dificultades ás empresas ambientais e aos afectados en xeral.

Todo isto tradúcese en:

- Dificultades para acceder á información ambiental e aos trámites mineiros por parte da veciñanza afectada e das asociacións ambientais

- Pola vía da Lei de Acompañamento dos orzamentos, pretenden que a Cámara Mineira (organismo privado integrado unicamente por empresas do sector) se converta no único rexistro público das concesións mineiras de Galiza, furtando a participación e o control público á cidadanía e aos partidos políticos.

- A Consellería de Industria négase a declarar a caducidade das concesións mineiras incumprindo así as disposicións legais. Así por exemplo, diante das peticións expresas á Consellería de Industria para que declare as caducidades das concesións mineiras de Erimsa na Terra Chá non se recibiu ningunha contestación. O Sindicato Labrego Galego ten rexistrado oficialmente esta petición á Consellaría de Industria seis veces dende 2013.

Terra, auga e patrimonio vénse ameazados en Triacastela coa ocupación de terras e montes comunais, a destrución de vías públicas de comunicación ou de recursos hídricos. Ademais,Cementos Cosmos está pasando literalmente por riba dun dos máis importantes patrimonios arqueolóxicos e paleontolóxicos de Galicia e mesmo do Estado español. Ante a solicitude de declaración da cova de Eirós como BIC, a administración mira cara a outro lado diante da súa inminente destrución.

Terra e auga tamén están ameazados en Lousame. Os titulares da explotación mineira de San Fins solicitaron unha autorización de vertido de augas mineiras industriais ao río San Fins. Gran parte desas augas verteranse sen tratamento algún. Para o resto consideramos que o tratamento proposto será totalmente insuficiente. Aparentemente ditas augas teñen uns contidos de metais pesados moi superiores ao legalmente establecidos e estarían afectando aos campos de marisqueo da Ría de Muros-Noia. Esta explotación carece de estudo de impacto ambiental a pesar de que foi requirido reiteradamente aos sucesivos titulares da mesma. Agora a empresa mineira denuncia á asociación ecoloxista ADEGA por tomar unhas mostras de auga na mina, reproducindo os modelos de criminalización que as empresas mineiras de todo o mundo aplican aos seus opositores.

Os III Encontros deste ano veñen precedidos da celebración en Santiago de Compostela da reunión de coordinadores rexionais de todo o mundo de Yes to Life No to Mining (YLNM). A rede galega ContraMINAcción será a anfitrioa, convidando aos seus membros a participar nos III Encontros para coñecer de primeira man as súas reflexións, obxectivos e accións en relación aos diferentes problemas relacionados coa minaría por todo o planeta. O movemento YLNM foi concibido en 2012 por individuos, organizacións e redes de todo o mundo preocupados polo benestar ameazado polo crecemento exponencial da minaría na última década. Xunto con estes convidados queremos realizar dentro do programa dos III Encontros, un evento festivo solidario en lembranza de Berta Cáceres, activista ambiental hondureña asasinada hai un ano, coñecida pola súa loita contra diferentes proxectos mineiros.

ContraMINAcción é un rede galega de colectivos que ten por obxectivos a identificación e análise dos diferentes proxectos mineiros en Galiza, compartir estratexias e medios para loitar contra a minaría destrutiva, servir de apoio xurídico e técnico aos afectados e difusión na na sociedade dos problemas que está a xerar a minaría, levando a cabo accións informativas en todas as comarcas. Na actualidade está composta por 23 colectivos (Agrupaçom de Montanha Augas Limpas, Asemblea Rural Galega, Asociación Cerne da Terra, Asociación ecoloxista Arco Iris, Asociación Véspera de Nada, Associação Socio-Cultural O Iríbio, Asociación Treze-Catorce, Comisión de Asociacións en contra das minas da Terra Cha, Contramínate Conmigo de Laxe, Federación Ecoloxista Galega, Plataforma pola defensa de Corcoesto e Bergantiños, Plataforma pola Defensa do Galiñeiro, Plataforma Veciñal Corno do Monte, Salva la Selva, Santa Comba Viva, Sindicato Labrego Galego, Sos Courel, SOS Groba e Verdegaia)

Diário Liberdade é um projeto sem fins lucrativos, mas cuja atividade gera uns gastos fixos importantes em hosting, domínios, manutençom e programaçom. Com a tua ajuda, poderemos manter o projeto livre e fazê-lo crescer em conteúdos e funcionalidades.

Doaçom de valor livre:

Microdoaçom de 3 euro:

Adicionar comentário

Diário Liberdade defende a discussom política livre, aberta e fraterna entre as pessoas e as correntes que fam parte da esquerda revolucionária. Porém, nestas páginas nom tenhem cabimento o ataque às entidades ou às pessoas nem o insulto como alegados argumentos. Os comentários serám geridos e, no seu caso, eliminados, consoante esses critérios.
Aviso sobre Dados Pessoais: De conformidade com o estabelecido na Lei Orgánica 15/1999 de Proteçom de Dados de Caráter Pessoal, enviando o teu email estás conforme com a inclusom dos teus dados num arquivo da titularidade da AC Diário Liberdade. O fim desse arquivo é possibilitar a adequada gestom dos comentários. Possues os direitos de acesso, cancelamento, retificaçom e oposiçom desses dados, e podes exercé-los escrevendo para diarioliberdade@gmail.com, indicando no assunto do email "LOPD - Comentários".

Código de segurança
Atualizar

Publicidade

Quem somos | Info legal | Publicidade | Copyleft © 2010 Diário Liberdade.

Contacto: info [arroba] diarioliberdade.org | Telf: (+34) 717714759

Desenhado por Ritech

O Diário Liberdade utiliza cookies para o melhor funcionamento do portal.

O uso deste site implica a aceitaçom do uso das ditas cookies. Podes obter mais informaçom aqui

Aceitar