Inspección de traballo pronunciouse estimando que 18 dos 25 puntos que este comité denunciou, son incumprimentos da lei de prevención de riscos laborais.

A inspección de traballo considera que a empresa Matinsa non estaba a cumprir coas súas obrigacións e poñía en risco a seguridade dos bombeiros tanto nas tarefas diarias dos parques como nas intervencións nas cales é de aplicación a lei de prevención.

A inspección decidiu impoñer uns prazos á empresa para cumprir con certos requirimentos, mentres outros son de carácter inmediato. Empezando pola descontaminación dos traxes de intervención con contaminacións biolóxicas ou químicas, derivadas de intervencións en industrias, incendios ou accidentes de tráfico, deberán ser descontaminados por empresas especializadas e alleas ao servizo, non polos propios bombeiros como ata agora en lavadoras normais. Non hai que esquecer que bombeiros do Morrazo tiveron que acudir a unha excarceración durante os labores de extinción do incendio de Fandicosta e fixérono con traxes contaminados de amoníaco.

Os equipos NRBQ (Nuclear Radiológico, bacteriológico e Químico) deberán pasar todas as inspeccións que manda o fabricante, así como os equipos e profesionais da unidade de mergullo de Vilagarcía, que desde a entrada no servizo de Matinsa non pasaran os recoñecementos médicos propios dos mergulladores profesionais.

Revisar o material de altura e retirar o caducado.

Tamén se impón a necesidade de contar con emisoras ATEX que permitan o seu uso en atmosferas explosivas para garantir a seguridade dos intervenientes. Neste punto cabe destacar que a empresa alegou que os bombeiros teñen prohibido actuar en atmosferas con presenza de gases, o cal ademais de non ser certo, non deixa de ser ridículo, pois se non interveñen os bombeiros quen o fai?

Tamén hai requirimento para reparar o vehículo Nodriz-contra incendios de Porriño que ten unha fisura na cisterna de auga e que a empresa ordenara levar mediado de auga no canto de reparar.

A inspección de traballo advirte a Matinsa que se segue incumprindo a lei e non soluciona as incidencias apreciadas polos técnicos enfrontarase a sancións de entre 2000 e 41000 euros.

Os parques afectados por estas deficiencias son os 4 xestionados por Matinsa, Morrazo, Vilagarcía, Salnés e Baixo Miño.