✍️ 
Traballadoras e traballadores de Atento na Coruña están desenvolvendo este luns a primeira xornada de paros laborais en rexeitamento aos despedimentos arbitrarios e a política de presións, acoso e ameazas que xa é unha práctica habitual nas relacións laborais nesta empresa. A isto, denuncian, hai que sumar as coaccións da mutua para que o persoal acurte a duración das súas baixas e se reincorpore ao seu posto aínda estando enfermo.
Para dar máis visibilidade a este conflito, os traballadores e traballadoras realizan concentracións diante das oficinas de Atento na céntrica rúa Juan Flórez, coincidindo coas horas dos paros laborais. Así houbo protesta este mediodía e volverase repetir ás 18 horas desta tarde.
Suspensión de emprego e soldo por 11 días
Ningunha das denuncias do comité de Atento é unha novidade. O persoal leva meses reclamando da dirección o cese dos abusos e un cambio radical nas relacións laborais, pero a única reposta son máis despedimentos, "que chegan a contagotas", e presións. De feito, nos últimos tempos o acoso tense acusado de xeito especial no departamento Gran Público, mentres que no de CAT-ADSL faise un "control continuado do persoal baseándose nunha 'xestión de desempeño' que en realidade só busca perseguir, controlar e sancionar as/os traballadoras/es".
A situación é tal, denuncia Mónica Díaz Carrodeguas, secretaria do comité e delegada da CIG na empresa, que "se están a dar casos de persoas que reciben sancións con suspensión de emprego e soldo durante 11 días, que é unha auténtica barbaridade, por motivos totalmente arbitrarios e que escapan do control dos e das traballadoras".
Ademais, con estes paros o comité tamén quere rexeitar a "pésima xestión das vacacións" de todo o centro, xa que a empresa non garante o goce das mesmas en período estival, e “ameaza” con asignalas “a dedo” de maneira unilateral.
Presións tamén da mutua
A todo isto hai que sumar as rexeitábeis actuacións por parte da mutua, que fai unha atención superficial do persoal que acode a consulta, mesmo con diagnósticos errados, e que aínda por enriba, exerce fortes presións para que os/as traballadores/as acurten as súas baixas.
Para enfrontar estes abusos e ante a falta de resposta adecuada por parte da empresa, o comité acordou iniciar un calendario de paros de unha hora por quenda de traballo e mobilizacións que se repetirán de xeito indefinido os luns de cada semana.