A jornada de violência policial e mobilizaçom popular contra o despejo do CSO A Insubmissa, na Corunha, tivo continuaçom esta terça-feira com duas detençons de pessoas acusadas de se mobilizarem no dia 23 de maio às portas da antiga Comandáncia de Obras do Concelho da Corunha.

No fim do dia, umha das pessoas detidas ficava livre e a outra entrava em prisom, após ambas apresentarem depoimento perante o juiz que irá instruir o caso. As acusaçons som "atentado contra a autoridade, lesons e desordens" e quem denuncia é a Polícia Local corunhesa. O modus operandi das forças repressivas parece confirmar um incremento da pressom contra o ativismo social, tanto a nível policial como judicial, o que no caso da Corunha se vê reforçado pola posiçom do Governo da Maré Atlántica, alegadamente "de esquerda", do lado da repressom.

Para esta manhá foi convocada umha concentraçom solidária às portas dos julgados da Corunha, esperando-se a decisom judicial sobre a continuidade em prisom do detido que já passou a primeira noite na cadeia.