Esta problemática está intimamente relacionada cos modelos de consumo da nosa sociedade, que produce millóns de toneladas de lixo ao ano (preto duns 10 millóns) que rematan nos nosos océanos, procedentes tanto das industrias como da poboación en xeral, por unha mala xestión dos residuos que xeramos.

Por iso, os días 25 e 26 de novembro ADEGA convida a participar nunha xornada reivindicativa e de voluntariado contra o lixo mariño nas seguintes LOCALIZACIÓNS:

O día 25 de novembro, venres, realizaranse limpezas da man do I.E.S Fin do Camiño en Fisterra e do C.E.I.P Atios na lagoa da Frouxeira en Valdoviño, levando a cabo unha xornada de concienciación das rapazas e rapaces sobre a problemática ambiental do lixo mariño.

O día 26 de novembro realizarase unha limpeza simultánea en diferentes puntos do país coordinados localmente por diversos colectivos.

ADEGA convoca a todas aquelas persoas interesadas en colaborar coas entidades organizadoras. Está previsto a realización da limpeza en:

- Lagoa da Traba: limpeza encabezada pola asociación Senda Nova.

- Lagoa de Baldaio: limpeza encabezada pola Cruz Vermella de Carballo.

- Lagoa de Doniños: limpeza encabezada por ADEGA Ferrol.

- Xunqueira do Lagares e praia de Samil: limpeza encabezada por ADEGA Vigo.

- Lagoa de Louro: encabezada por ADEGA Compostela.

Convidan a todas aquelas persoas interesadas a contactar cos colectivos participantes nesta xornada de limpeza e achegarse as nosas praias e lagoas para, xuntas, conseguir un cambio de conciencia na sociedade e unha redución da presenza de residuos e do deterioro do noso litoral.