Apesar também da dureza da ofensiva repressiva espanhola, que conseguiu invalidar qualquer pretensom institucional de ir além da Constituiçom monárquica legada por Franco, o povo catalám continua a manter a tensom mobilizadora, como cada 11 de setembro na última década. Várias centenas de milhares enchêrom a Diagonal da capital catalá (1 milhom, segundo a Guarda Urbana).
Os ataques mediáticos espanhóis, que vaticinavam um fracasso, as manipulaçons de todo o tipo contra o movimento de massas pola independência, voltárom a esbarrar com um banho de realidade: a de um povo catalám firmemente convencido da necessidade de contar com um Estado próprio.
Falta ainda, contodo, a correlaçom de forças que permita dar os passos efetivos para a ansiada República. A direçom da pequena burguesia continua a mostrar a incapacidade de quebrar o bloqueio imposto polo Estado espanhol, enquanto setores da esquerda independentista, que também aumentou a participaçom na sua manifestaçom na parte da tarde, tentam ganhar introduçom no movimento operário como via para disputar a direçom do movimento ao PDCat e a ERC.
A Diada de Ciudadanos junta 140 pessoas (incluindo 80 cargos do partido)
Em simultáneo, o “partido laranja”, de direita liberal e espanholista, continuou com a sua retórica inquisitorial, denunciando “o sequestro” do Dia Nacional do Principat e asseverando ser a voz da maioria do povo catalám, recorrendo para isso a um discurso cheio de ódio e mentiras, além de continuar a alentar as violentas retiradas de laços amarelos que realizam conjuntamente grupos de extrema-direita e as bases e cargos públicos de Ciudadanos.
O ato político que convocou nesta Diada começou cerca das 11 da manhá na Plaça del Rei de Barcelona e foi acompanhado por umhas 140 pessoas, o que contrasta com os números dos atos convocados polas forças independentistas e deixa em evidencia a ridícula capacidade de mobilizaçom dum partido auspiciado polos grandes meios, promocionado através de cuidadas e estudadas campanhas propagandísticas. Os grandes capitais do Estado, certamente, nom tivérom um bom dia.
