Pais, maes, estudantes, docentes... toda a comunidade educativa, com o apoio da vizinhança pontesa, saiu às ruas da vila das Pontes para exigir a continuidade do CEIP Monte Caxado, um centro de ensino público que a Junta da Galiza quer fechar aproveitando as férias de verao.
A integraçom do centro no outro da mesma vila, o CEIP A Magdalena, permitiria ao PP cortar mais gasto em educaçom pública, suprimindo vagas de pessoal docente, de apoio e administrativo, amontoando alunos e alunas e, portanto, deteriorando as condiçons educativas, principalmente para os coletivos com necessidades especiais que passariam a ser ainda mais desatendidas.
O governo municipal das Pontes, em maos do PSOE, manifestou o seu rejeitamento à medida, tal como as diversas forças sindicais, com destaque para a CIG, principal sindicato do setor.
As mobilizaçons estám a suceder-se nos últimos dias, com milhares de pessoas a participar dos protestos por umha medida arbitrária que convive com o apoio incondicional que a Junta da Galiza continua a dar aos centros privados, mediante o desvio de dinheiro público para os chamados centros privados concertados.
Também em Outes...
Nom é o único centro público educativo que irá ser imediatamente fechado na Galiza. O CEIP Emilio Navasqüés no Cruzeiro de Ro, Outes, será também suprimido, se as mobilizaçons que também estám a acontecer nom o impedirem. Outros como o CPI Tomás de Lemos de Ribadávia e o IES de Cela Nova verám reduzidos os postos de trabalho docentes e a oferta educativa.
A seguir, o vídeo da manifestaçom decorrida na sexta-feira dia 23 nas Pontes (GaliciaéXornalGalego):